Shkolla Shqipe “Naim Frashëri” në Montreal hap dyert për vitin e katërt
Të dashur anëtarë, prindër, mësues, vullnetarë dhe miq të Shoqatës Kulturore Shqiptare të Montrealit,
Me shumë kënaqësi dhe krenari ju njoftojmë se më 19 shtator 2026, nga ora 11:00 deri në 13:00, Shkolla Shqipe “Naim Frashëri” në Montréal hap dyert për vitin e katërt radhazi dhe çdo të shtunë.
Ky është një moment i rëndësishëm për Shoqatën sonë dhe për të gjithë komunitetin shqiptar të Montrealit. Katër vite më parë nisëm këtë rrugëtim me një qëllim të qartë: tju krijojmë fëmijëve tanë mundësinë të mësojnë të këndjnë dhe të përmirësojnë gjuhën shqipe, të njohin historinë, kulturën dhe traditat tona dhe, mbi të gjitha, të ruajnë lidhjen e tyre me gjuhën dhe rrënjët shqiptare.
Një shkollë për gjuhën, kulturën dhe identitetin
Këtë vit, shkolla mirëpret fëmijë nga mosha 5 deri në 12 vjeç.
Përmes mësimit dhe aktiviteteve të përshtatura sipas moshës, nxënësit do të kenë mundësi të mësojnë dhe të përmirësojnë gjuhën shqipe, si dhe të njihen më nga afër me historinë, gjeografinë, kulturën, letërsinë, përrallat, muzikën dhe traditat shqiptare.
Qëllimi ynë nuk është vetëm t’u mësojmë fëmijëve gjuhën shqipe, por edhe tju japim mundësinë të krijojnë një lidhje të natyrshme dhe të qëndrueshme me identitetin dhe trashëgiminë e tyre kulturore.
Materiale të reja mësimore
Këtë vit kemi kënaqësinë të sjellim edhe disa risi të rëndësishme në procesin mësimor.
Nxënësit do të kenë në dispozicion librat e rinj për grupin e tretë, si dhe tekstet e Historisë dhe Kulturës Shqiptare, të siguruara me mbështetjen e Qeverisë së Republikës së Shqipërisë dhe Ambasadës së Republikës së Shqipërisë në Kanada.
Këto materiale do të ndihmojnë mësuesen dhe nxënësit në zhvillimin e një programi më të pasur, më të strukturuar dhe më të përshtatur për nevojat e tyre gjatë vitit shkollor.
Një ndihmesë e çmuar për mësimin
Një tjetër risi e rëndësishme këtë vit është pajisja e mësueses me një kompjuter të dhuruar nga shkrimtari Shqiptaro-Kosovar Zejadin Dedinca.
Në emër të Shoqatës Kulturore Shqiptare të Montrealit dhe të Shkollës Shqipe “Naim Frashëri”, shprehim mirënjohjen tonë për këtë gjest të çmuar dhe për mbështetjen ndaj edukimit të brezit të ri.
Kontribute të tilla janë dëshmi se shkolla shqipe është një përgjegjësi e përbashkët dhe se çdo ndihmë, sado e vogël apo e madhe, mund të sjellë një ndryshim të rëndësishëm.
Biblioteka e Shkollës Shqipe – një libër nga ju, një mundësi për shumë lexues
Këtë vit dëshirojmë të vazhdojmë pasurimin e bibliotekës së Shkollës Shqipe “Naim Frashëri”, një nismë që ka nisur falë bujarisë së komunitetit tonë.
Falënderojmë Shkendije Ibishi Shala, shkrimtare shqiptare në Kanada, për dhurimin e disa librave të saj në shqip dhe anglisht, Zejadin Dedinca, si dhe disa familje të tjera që kanë blerë dhe dhuruar libra për shkollën.
Dëshirojmë që kjo nismë të zgjerohet edhe më tej. Ftojmë shkrimtarët, familjet dhe të gjithë dashamirësit e librit të dhurojnë libra në gjuhën shqipe, për fëmijë ose të rritur.
Synimi ynë është të krijojmë një bibliotekë ku librat të mos lexohen vetëm në shkollë, por të mund të merren edhe në shtëpi nga nxënësit dhe familjet dhe më pas të rikthehen për lexues të tjerë.
Një libër i dhuruar sot mund të sjellë gjuhën, kulturën dhe dijen shqiptare në shumë familje nesër.
Mbështetja juaj për Shkollën Shqipe
Shkolla Shqipe është një projekt i komunitetit dhe për komunitetin. Për këtë arsye, donacionet dhe mbështetja financiare janë gjithmonë të mirëpritura.
Kontributet tuaja do të na ndihmojnë në sigurimin e materialeve mësimore, librave, mjeteve didaktike dhe pajisjeve, si dhe në zhvillimin e aktiviteteve të ndryshme edukative e kulturore për fëmijët.
Çdo kontribut është një investim në brezin e ri dhe në ruajtjen e gjuhës shqipe në diasporë.
Për donacione, mund të bëni pagesë me e-Transfer në adresën zyrtare të Shoqatës: [email protected].
Ju lutemi, në mesazhin e e-Transfer-it të shënoni se dhurimi është për Shkollën Shqipe “Naim Frashëri”, si dhe emrin dhe mbiemrin tuaj të plotë.
Për çdo pyetje ose informacion shtesë lidhur me donacionet, jeni të mirëpritur të kontaktoni Shoqatën.
Kërkojmë edhe mbështetjen e vullnetarëve
Për të vazhduar dhe zhvilluar më tej aktivitetet e Shkollës Shqipe, Shoqata dëshiron të krijojë një grup të vogël vullnetarësh të angazhuar, të cilët do të mund të kontribuojnë në projekte dhe aktivitete të ndryshme gjatë vitit.
Ndihma mund të konsistojë në organizimin e aktiviteteve dhe projekteve kulturore, menaxhimin e bibliotekës, komunikimin, aktivitetet me fëmijët apo në fusha të tjera ku nevojitet mbështetje.
Nëse keni dëshirë dhe mundësi të kontribuoni me kohën, njohuritë apo përvojën tuaj, ju ftojmë të bashkoheni me ne.
Një komunitet i fortë ndërtohet kur secili jep atë që mundet.
Një falënderim për komunitetin
Falënderojmë përzemërsisht të gjithë prindërit, mësuesit, vullnetarët, anëtarët e Shoqatës, donatorët dhe bashkëpunëtorët që kanë mbështetur Shkollën Shqipe gjatë këtyre katër viteve.
Falë angazhimit të tyre, kjo shkollë vazhdon të rritet dhe t’u ofrojë fëmijëve tanë një hapësirë ku shqipja flitet, mësohet, këndohet dhe përjetohet me dashuri.
Ftojmë gjithashtu çdo prind dhe çdo familje shqiptare në Montréal që ta ndajë këtë informacion me të afërmit, miqtë dhe familjet e tjera shqiptare.
Sa më shumë fëmijë të kemi në Shkollën Shqipe, aq më shumë mundësi krijojmë që gjuha, kultura dhe trashëgimia jonë të vazhdojnë të jetojnë brez pas brezi.
Të dhënat për hapjen e vitit shkollor
Data e fillimit: E shtunë, 19 shtator 2026
Orari i shkollës: Çdo të shtunë, 11:00 – 13:00
Vendndodhja: 6767 Chemin de la Côte-des-Neiges, Montréal, Québec
Mosha e nxënësve: 5–12 vjeçRegjistrimet dhe informacioni
Për regjistrime dhe informacione të mëtejshme, ju lutemi të kontaktoni:
Anila Hasko
Koordinatore e Shkollës Shqipe “Naim Frashëri”
Tel.: 514-883-3919
Për çdo pyetje, kërkesë ose sugjerim tjetër, mund të na shkruani në adresën zyrtare të email-it të Shoqatës: [email protected]. Grupi i komunikimit të Shoqatës do të jetë në dispozicion për tju dhënë informacionin e nevojshëm dhe për tju kontaktuar sa më shpejt.
Ju mirëpresim me shumë kënaqësi për të nisur së bashku vitin e katërt të Shkollës Shqipe “Naim Frashëri” në Montréal.
Gjuha shqipe është një nga lidhjet më të forta që fëmijët tanë kanë me rrënjët e tyre. Ta ruajmë, ta mësojmë dhe t’ua përcjellim brezave të ardhshëm është një përgjegjësi që na përket të gjithëve.